നിങ്ങള്‍ക്കൊരു പഠനതന്ത്രം ഉണ്ടോ?

നന്നായി പഠിക്കാൻ നിങ്ങൾ ആഗ്രഹിക്കുന്നുണ്ടോ? നിങ്ങളുടെ "പഠന തന്ത്രം" എന്താണ്? പഠനത്തിൽ ശ്രദ്ധ കേന്ദ്രീകരിക്കാൻ സഹായകമായ ചില ലളിതമായ പഠന ടിപ്പുകൾ ഇതാ…..

1. പഠനത്തിന് ഏറ്റവും നല്ല സ്ഥലവും സമയവും തിരഞ്ഞെടുക്കുക: പഠിക്കാൻ ഏറ്റവും നല്ല സ്ഥലത്തെയും സമയത്തെയും കുറിച്ച് ഓരോരുത്തർക്കും അവരുടേതായ ധാരണയുണ്ട്. നിങ്ങളുടെ കിടപ്പുമുറിയായാലും സ്‌കൂൾ ലൈബ്രറിയായാലും, നിങ്ങൾക്ക് അനുയോജ്യമായ ഒരു പഠന ഇടവും സ്ഥിരമായ പഠന സമയവും കണ്ടെത്തുകയും അതില്‍ ഉറച്ച് നില്‍ക്കുകയും ചെയ്യുക.
2. എല്ലാ ദിവസവും പഠിക്കുക: എല്ലാ ദിവസവും അൽപ്പം പഠിക്കുകയാണെങ്കിൽ, പഠനത്തോട് ഒരു തുടര്‍ച്ചയായ ബന്ധം കാത്തുസൂക്ഷിക്കാന്‍ അത് നിങ്ങളെ സഹായിക്കും. കാര്യങ്ങൾ മനസ്സിലാക്കാനും അവസാനനിമിഷത്തിന്റെ സമ്മർമൊഴിവാക്കാനും അത് സഹായകമാണ്.
3. പഠനസമയത്തെ ഉചിതമായി ക്രമീകരിക്കുക: എന്തൊക്കെയാണ് പഠിച്ചു തീർക്കണ്ടത് എന്ന രീതിയിൽ ഒരു TO DO ലിസ്റ്റ് തയ്യാറാക്കുകയും അതിനനുസരിച്ചു പഠനവിഷയങ്ങളെ തരംതിരിച്ചു സമയക്രമീകരണം നടത്തുകയും ചെയ്യുക. ഓരോ വിഷയത്തിന്റെയും പ്രാധാന്യം അനുസരിച്ചു വേണം ടൈംടേബിള്‍ ക്രമീകരിക്കാന്‍.
4. നിങ്ങളുടെ പഠന ശൈലി കണ്ടെത്തുക: പഠനത്തിന് ഓരോരുത്തര്‍ക്കും ഓരോ ശൈലിയുണ്ട്. നിങ്ങൾക്ക് ഏറ്റവും ഉപകാരപ്രദമായ പഠന ശൈലി ഏതാണെന്ന് മനസ്സിലാക്കുകയും അതനുസരിച്ചു പഠനം മുന്നോട്ട് കൊണ്ടുപോകുകയും ചെയ്യുക .
5. പഠനത്തെ നിരന്തരം അവലോകനം ചെയ്യുക: ആഴ്ചയിൽ ഒരിക്കലെങ്കിലും നിങ്ങൾ ക്ലാസ്സിൽ പഠിച്ച കാര്യങ്ങളിലേയ്ക്ക് തിരിച്ചുപോകണം. പഠനകാര്യങ്ങള്‍ വീണ്ടും വീണ്ടും ചിന്തിക്കുന്നത് പഠിച്ച ആശയങ്ങൾ മനസിലാക്കാനും ഏറ്റവും ആവശ്യമുള്ളപ്പോൾ അവ ഓർമ്മിക്കാനും നിങ്ങളെ സഹായിക്കും.
6. ആവശ്യമെങ്കിൽ പഠനരീതി പരിഷ്കരിക്കുക: പഠനത്തെ അവലോകനം ചെയ്ത ശേഷം ഫലം മികച്ചതായി തോന്നുന്നില്ലെങ്കിൽ പഠനരീതിയിൽ മാറ്റങ്ങൾ വരുത്തണം.
7. തുടർച്ചയായി പഠിക്കാതെ ഇടവേളകൾ എടുക്കുക: പഠനത്തിനിടയിലെ ഇടവേളകള്‍ വളരെ പ്രധാനപ്പെട്ടവയാണ്. പ്രത്യേകിച്ചും, ക്ഷീണമോ മടുപ്പോ നിരാശയോ തോന്നുകയാണെങ്കിൽ ഇടവേളകളിലേക്ക് പോവുകയും ചെറുവിനോദങ്ങളില്‍ ഏര്‍പ്പെടുകയും വേണം. ഒരേ വിഷയത്തില്‍ കൂടുതൽ സമയം പ്രവർത്തിക്കുന്നത് യഥാർത്ഥത്തിൽ നിങ്ങളുടെ ശരിയായ പഠനത്തെ സാരമായ രീതിയിൽ ബാധിക്കും .
8. സംശയങ്ങൾ തീർത്തു പഠിക്കുക: സംശയമുള്ള കാര്യങ്ങൾ പഠിച്ച് തന്നെ മുന്നോട്ടു പോകുന്നതാണ് അത് പിന്നത്തേക്ക് വെക്കുന്നതിനേക്കാളും ഒഴിവാക്കുന്നതിനേക്കാളും നല്ലത്. നിങ്ങൾക്ക് മനസ്സിലാകാത്തതും സംശയമുള്ളതുമായ കാര്യങ്ങളെക്കുറിച്ച് അധ്യാപകരുമായോ സുഹൃത്തുക്കളുമായോ പങ്കുവച്ചു സംശയങ്ങൾ തീർത്തു വേണം പഠനം മുന്നോട്ടു കൊണ്ടുപോകാന്‍.
9. പ്രചോദിതരായി തുടരുക: പഠിക്കുമ്പോള്‍ എന്തിനാണ് കഠിനാധ്വാനം ചെയ്യുന്നത് എന്നതിന്റെ കാരണങ്ങൾ എപ്പോഴും ഓര്‍മ്മിക്കുക. അത് പഠനത്തിനുള്ള പ്രചോദനം വര്‍ദ്ധിപ്പിക്കും. കഠിനാദ്ധ്വാനം ചെയ്യാനുള്ള കാരണങ്ങൾ ആണ് യഥാർത്ഥ പ്രചോദനം എന്നോര്‍മ്മിക്കണം.

നന്നായി പഠിക്കുന്നവര്‍ ഒഴിവാക്കാന്‍ ശ്രമിക്കേണ്ട കാര്യങ്ങള്‍

പഠനം എങ്ങനെ എളുപ്പമാക്കാം, ഏറ്റവും നല്ല പഠന രീതികൾ എന്തെല്ലാമാണ് എന്നതിനെകുറിച്ചു നാം എപ്പോഴും കേൾക്കാറുണ്ട്. എന്നാൽ പഠിക്കുന്ന വിദ്യാര്‍ത്ഥികള്‍ ഒഴിവാക്കേണ്ട കാര്യങ്ങളെക്കുറിച്ചു കൂടി നാം അറിഞ്ഞിരിക്കണം.

1. ഏതെങ്കിലും ഒരു വിഷയം മാത്രം കൂടുതലായി പഠിക്കുക എന്നതിനേക്കാള്‍ എല്ലാ വിഷയങ്ങൾക്കും തുല്യ സമയം നൽകി പഠിക്കുന്നതാണ് നല്ലത്. അതേസമയം കഠിനമായ വിഷയങ്ങള്‍ക്ക് താരതമ്യേന കൂടുതല്‍ സമയം ചിലവഴിക്കേണ്ടി വരും. പക്ഷേ, ഒരു വിഷയത്തില്‍ മാത്രം ശ്രദ്ധ കൊടുത്ത് മറ്റുവിഷയങ്ങളെ അവഗണിച്ചാല്‍ പൊതുവില്‍ പരാജയമായിരിക്കും ഫലം.
2. ഒരേ സമയം ഒന്നിലധികം കാര്യങ്ങൾ ചെയ്യുന്നത് ഒഴിവാക്കുക. മൾട്ടി ടാസ്കിങ് എപ്പോഴും പഠനസമയം കുറയ്ക്കുകയാണ് ചെയ്യുക.
3. പരീക്ഷയ്ക്ക് തൊട്ടുമുമ്പ് ഒരു ചെറിയ കാലയളവിൽ മാത്രം തീവ്രമായി പഠിക്കുന്ന രീതി ഒഴിവാക്കുക. ശരിയായ വിശ്രമം കൊടുക്കാതെയുള്ള പഠനരീതി ആരോഗ്യത്തെ മാത്രമല്ല തുടര്‍പഠനത്തെയും സാരമായ രീതിയിൽ ബാധിക്കും. ഇത്തരം പഠനരീതി യോഗ്യതാപരീക്ഷകളില്‍ കടന്നുകൂടാന്‍ സഹായകമായ ഒന്നല്ല.
4. പഠന സമയങ്ങളിൽ ടെലിവിഷന്‍, സോഷ്യൽ മീഡിയ എന്നിവ ഉപയോഗിക്കാതിരിക്കുക. സോഷ്യൽ മീഡിയ പ്ലാറ്റ്ഫോമുകൾ വിദ്യാർത്ഥി അറിയാതെ തന്നെ അവരുടെ ഒരുപാട് സമയം കവർന്നെടുക്കും. മാത്രവുമല്ല, അത് ശ്രദ്ധിച്ചു പഠിക്കാനുള്ള താത്പര്യത്തെയും ആവേശത്തെയും കെടുത്തിക്കളയുകയും ചെയ്യും.

ഈ വരികള്‍ ഓര്‍മ്മിക്കാം...

വിദ്യാര്‍ത്ഥിക്കില്ല താന്‍ സുഖം
സുഖാര്‍ത്ഥിക്കില്ല താന്‍ വിദ്യ‍
വിദ്യാര്‍ത്ഥി വിടണം സുഖം
സുഖാര്‍ത്ഥി വിടണം വിദ്യ!